Gulli Björnsson er 28 ára  gítarleikari og tónskáld úr Kópavoginum. Hann vinnur með hljóðfæraleik, rafhljóð og myndrænt efni í tónlist sinni og tvinnar það  við náttúrufyrirbæri og náttúru-upplifun.

 

“Ég er svona eilífðarstúdent, í Bandaríkjunum. Ég fór þegar ég var 18 ára, þá fór ég að læra á klassískan gítar við Manhattan School of Music í New York og fór síðan í meira gítarnám við Yale School of Music í Conneticut og er núna búinn að vera eitt ár í doktorsnámi við Princeton University í New Jersey.”

 

„Úr heljar ofni“ er skrifað fyrir gítar, hljómborð, slagverk, rafhljóð og myndband. Það var frumflutt á UNM: Ögnun í júlí 2020. 

 

„Verkið er fyrir þrjú hljóðfæri sem mig langaði að semja fyrir svolítið lengi. Þegar ég var að fikta við þessi hljóðfæri þá fannst mér vera eitthvað svona djöfullegt en samt rosa kúl og dularfull hljóð sem maður getur fengið úr þessum hljóðfærum og ég tengdi þetta strax við einhvers konar eldfjöll og einhvers konar eldfjallalandslag þannig að ég var bara svona að grúska á google og leita að einhverju til að lesa og veita mér innblástur og ég datt á ljóð eftir Eggert Ólafsson sem að kallast Ferða-Rolla þar sem hann fer yfir lýsingar sínar á Heklu. Þetta er alveg ótrúlega merkilegt ljóð, finnst mér, af því að þetta er skrifað á forn-íslensku þannig að þetta er svona svakalega dramatískt orðalag sem að maður skilur en hálf-skilur ekki þannig að mér fannst þetta tengjast ótrúlega vel við þessi þrjú hljóðfæri.”

 

„Ég held að ég vilji bara að tónlistin sé sérstaklega eitthvað sem maður upplifir, kannski meira en að maður sé að hugsa rosalega mikið og hlusta.  Þegar þetta er sett saman rétt við konseptið sem verkið fjallar um þá getur það verið mjög kúl að stíga í einhvern svona heim sem er hljóð og mynd, einhvers konar upplifun í náttúru sem ég held að allir geti tengt við.”

 

„Ég reyni yfirleitt að finna eitthvað  konsept sem ég skil ekki alveg við náttúruna. Ég veit ekki alveg af hverju mér finnst þetta vera merkilegt eða kúl, eitthvað sem ég hugsa um aftur og aftur og aftur, og er ekki alveg útskýrt. Kannski tengist þetta eitthvað því að ég fór ungur til Bandaríkjanna og svo kem ég alltaf heim til Íslands á sumrin, það er allt svo fallegt hérna og maður finnur mikinn innblástur úr náttúru Íslands. Það er gaman að hugsa um þetta af því að mér finnst alltaf að þegar ég er á Íslandi og búinn að vera hérna í einhvern tíma þá get ég ekki beðið eftir að fara til Bandaríkjanna, sko, fastur á þessari eyju. Svo þegar ég er í Bandaríkjunum þá sakna ég Íslands. Foreldrar mínir eiga sumarbústað uppi í Skorradal og það er bara paradís fyrir mér og ég fæ svona nostalgíu-móment þar sem ég bara hugsa „vá hvað ég vildi að ég væri þar.“ Þetta er svona stöðug barátta, grasið er alltaf grænna hinum megin. Þannig að það er ágætt að flakka á milli svona reglulega sko, ég er orðinn vanur því núna.”

 

Kammerverkið “Bylur” var samið fyrir Tvinna, viðburð UNM á Íslandi um síðasta sumar. Verkið er fyrir rafmagnsgítar, hljómborð, tvo víbrafóna, fagott, tvær flautur, fiðlu og bassa. Verkið fer fyrir hönd Íslands á UNM 2020 í Tampere ásamt sex öðrum íslenskum verkum. 

„Eins og titillinn gefur til kynna, það er um byl og storm. Ég hef stundum fundið fyrir þessu á Íslandi, það er brjálað rok úti en maður er fastur inni og er öruggur. Og þá er einhver tilfinning sem ég finn fyrir þar sem maður er hræddur við það sem er úti en maður er samt svo öruggur og svona svakalega góð tilfinning sem tengir tvær andstæður, hræðslu og öryggi. Og ég reyndi semsagt að góma þetta í einhverjum hljómum.

 

„Þetta finnst mér svolítið skemmtilegt, ég hafði fyrir þetta ekkert verið í tónsmíðanámi og ég hafði ekki beint haft tækifæri til að semja fyrir eitthvað sem var ekki bara gítartónlist eða þá gítar og eitthvað annað. Og svo fékk ég hérna tækifæri í gegn um UNM að semja verk og gat valið hvaða hljóðfærasamseteningu sem er. Þannig að ég hugsaði skapandi og var að hlusta svolítið mikið á John Luther Adams á þessum tíma og kannski stal einverri  hljóðfærasamsetningu af honum úr einhverjum verkum sem mér fannst kúl og bætti svo inn mínu. En annars var ég bara að hugsa hvernig mismunandi hljóðáferðir gætu blandast saman og reyndi að fá eitthvað svona aðeins öðruvísi en bara strengjakvartett eða blásturshljóðfærasamsetningu.”

 

„Ég tengi rosa mikið við það að spila sjálfur, þótt það sé ekkert endilega fyrir gítar, bara svona af því að mér finnst ég þá einhvern veginn geta fundið fyrir því í líkamanum, embody hvað tónlistin er að gera, hvernig er að spila það. En það er bara svona eitthvað sem ég geri í lokin þegar ég er ekki að semja. Ég yfirleitt byrja með einhver konsept og stundum bý ég til lítið tölvuforrit sem tekur einhverja minimalíska hljóma og pattern sem býr til fullt af stöffi sem ég síðan nota til þess að vinna úr. En ég held að ef maður semur bara á hljóðfærið sitt þá fellur maður í einhverja gildru þar sem maður gerir eitthvað sem hljóðfærið vill gera og það getur verið last á verkinu. En sama, held ég, ef þú ert bara að vinna í nótunum ef þú vilt gera eitthvað sem er svona symmetrískt og kúl, að maður missi kannski tengingu við það hvernig þetta er, að hlusta á það og hvernig er að spila það. þannig að ég reyni svona að finna balans á milli þessara tveggja hluta.”

 

„Mér finnst þessi hátíð, Ung nordisk musik, ótrúlega merkileg hátíð því hún er búin að vera til svo lengi, bara frá þarna beint eftir seinni heimsstyrjöld. Ég fór síðasta sumar til Svíþjóðar og það var ótrúlega áhugavert að sjá svona hvað aðrir, önnur tónskáld í svipuðum aldurshópi og maður sjálfur eru að gera. Ég hef alltaf verið Bandaríkjunum, þarna voru eiginlega langflestir í Skandinavíu eða Evrópu, það var svolítið annað væb og aðrar pælingar og ég tók bara mjög mikið út úr þessu. Fyrir utan það að það er bara líka ótrúlega gaman. En ég held að þetta sé mjög mikilvægt, að halda þessu norræna samstarfi áfram því annars getur það gerst að hópar kannski fara að loka sig af og það verður svona einhver keppni á milli, ég held að það sé miklu skemmtilegra að við séum öll vinir og hjálpum  hvoru öðru og tölum saman.”

  • Instagram - White Circle
  • Twitter - White Circle
  • White Facebook Icon